【土瓜灣重建】扎根鴻福街7載土家逼遷倒數：社區未完繼續化零為整

眾新聞 | 時政類 | Aug 8, 2021

此影片謄本由Ka製作

★非作商業用途，本檔案版權歸版權持有人獨有★

「對我哋嚟講，呢一度係被拆散，但我們相信，社區的可能性未完，土瓜灣的社區未完，香港的社區都未完。」

再見
鴻福街十六號

8月1號，「土家100+」展覽原定展期最後一日。
返到土家幹事瑞玲要做嘅第一件事，就係為旁邊泰國舖頭貓咪「呀給」餵藥。

幹事瑞玲:「啲街坊黎到土家，應該話黎到鴻福街，就會同附近嘅舖頭打招呼，基本上我哋街頭行去街尾要半個鐘。如果放咗學，呢咁啲小朋友就會蜂擁而至。基本上喺度當值嘅義工呀喺度出現嘅成員，啲手手腳腳都被拉住哂，陪下佢地打機啦，講心事啦，或者啲街坊經過會嚟打躉傾計呀。」

「土家」故事館喺2014年成立，依家由「維修香港」同埋「社區文化關注」兩個團體共同營運。過去7年曾經舉辦各式各樣嘅活動，例如土墟，團年飯，工作坊，放映會，同埋鬼屋等等。

幹事阿彬:「歡迎大家黎到鬼國」
幹事瑞玲:「好似海洋公園咁，然後條走廊有噴煙機，整到好似山竹咁，有紅紅綠綠的燈。有紙紥公仔」
幹事阿彬:「我地仲要真係山竹塌樹後，去執樹枝樹幹，不斷塞入去，令大家真的要跨,爬入去」
幹事瑞玲:「香港人又要返工」
幹事阿彬:「佢地(小朋友)仲要真係笠住頭套就可以玩成晚，一除頭套，汗水不斷流落黎」
成員阿賢:「但係囉，佢地就係咁細個就要番工，話好累呀，聽日再黎」
眾人:「哈哈哈......」
幹事瑞玲:「咁有時，我地會有新成員，或者新的實習同學，佢地(街坊)好有經驗架，教佢地『拿~你地識街坊要點呀嘛，你點解一個人坐係度?』」
成員阿賢:「咁有次試過個細佬跟左我地去維修隊，到街坊家中維修，媽媽就無啦啦打比我『呀邊個係咪同你一齊呀?哦!好!你講呀嘛!拜拜!』跟住就收左線，街坊對我地信任度好高。」

下載檔案

所有資料非作商業用途，若有內容侵權，請即通知我們移除。

幹事瑞玲:「有好多舊街坊，然後啲小店呢其實係唔係淨係做生意嘅，佢地好習慣同人吹水。入到黎呢度，你會覺得慢啲，唔係個個都要開工。我地係喺呢一個社區本身有嘅個氣氛為基礎上去做多啲社區營造工作。」

以往嘅土家相當熱鬧，係街坊同埋小朋友打躉嘅地方，不過而家大部分單位同埋地舖都空置哂。2016年，市建局係土瓜灣南部連續開展幾個重建項目，牽涉鴻福街銀漢街啟明街等等，
影響超過8000人。

幹事瑞玲:「市建局政策其實係真係唔係好以人為本，即係包括冇安置，佢亦都唔會理佢舖頭個各行各業搬遷復業需要。面對呢啲佢個大政策或者大方向根本好難話所謂係幫到街坊，只能陪伴。佢真係有啲咩事好徬徨無助嘅時候，起碼係陪下佢啦，可能上市建局搵個職員理論又好，點都好，咁我地陪佢囉。好多街坊係同市建局，或者發展局或者係地政署係做筆友，不停咁樣寫信要寫訴求，用唔同方法要搵個代表出嚟。但當然呢幾年佢哋都，所謂的代表呀，官員呀都係唔肯行落嚟見街坊。」

成員阿賢:「所謂街坊嘅情，都被市建呀，或者畀重建拆得七七八八。」
幹事瑞玲:「真係好簡單我哋每日，兩餐三餐食開嘅茶餐廳突然之間冇咗，本身打開招呼打開牙骹吹開水嘅街坊唔見咗，咁呢啲日常失去其實呢幾年都面對緊。」

面臨重建，土家同樣被迫遷，政府動用<<收回土地條例>>收返土地，土家去年底被票控霸佔官地，佢哋選擇抗辯，最終無功而回，今年4月被判要喺8月16號遷出。

幹事瑞玲:「<<收回土地條例>>其實一個尚方寶劍，就算市建局係呢一個重建範圍，根本就係全部都起私樓，會喺商場㗎。又唔會話喺半幢公屋，半幢居屋都好呢，其實都係可以叫做符合公眾利益㗎喎。」

成員阿賢:「所以你嗰個抗辯，其實你點樣講呢個社區或者係有咩訴求嘅，其實去到法庭呢佢(法官)原來係可以唔受理呀。佢淨係Base on嗰個條文，話你係咪霸佔官地，其實你都係要走
，嗰個抗辯其實都係好無力。」

幹事瑞玲:「去到其實被控霸佔官地，已經係對於街坊嚟講已經係一個好大壓力嘅階段，因為好多都未經歷過一單官司，其實對佢嚟講係無端端捲入一單官司。其實對佢黎講係，咁我可以點呀?姐係你逼住我而家走，我已經咁努力搵咗幾十間舖位，我都走唔到，咁係唔係我問題?其實唔係。」

搬遷在即，告別之際，佢地舉辦名為「土家100+」嘅展覽，展出各種舊物與故事，回顧呢7年係土家回憶。幹事阿彬:「因為土家就唔係喺呢度就完結，只係鴻福街呢度完結，咁我地就告別呢個鴻福街咁樣囉。咁喺呢個告別嘅時候呢我就想做一個回顧咁，我哋就可以一齊入去望下。」

重建令到小店被迫光榮結業，舖戶搬遷冇辦法留住物件，土家就代為保存展示，透過物件去訴說商舖嘅故事。好似超過50年歷史聯安印務嘅打字機，58年歷史樓梯鋪財記百貨嘅玻璃櫃甚至將榮興茶餐廳同埋港泰小廚嘅卡座，整個搬左黎土家。如今，輪到土家搬遷，佢哋選擇以另類的方式將地磚留落嚟。

幹事阿彬:「早兩年到啦，我地條走廊呢有個位Keep住爆開。咁爆開之後，我就無聊都係執起，執起又儲下，執起又儲下。傾展覽嘅時候，我哋都話不如搵啲嘢擺落扭蛋機扭啦，咁就扑碎啲磚。寓意這個土家嘅一啲嘢可以俾人帶走，呢個係一種保留返土家嘅文物咁樣囉。」
幹事瑞玲:「本身呢度嘅地磚都係有佢嘅歷史故事，就係因為鴻福街16號呢個地舖嘅前身，其實就係『昌興雞鴨』。紅色嗰啲係防滑地磚嚟嘅，鋪頭中間有條溝渠呢，其實都係嗰陣時攞嚟洗雞鴨血。咁就所以就都係保留嗰個歷史嘅一部分，就融入咗去呢一個嘅扭蛋度。同埋我哋有幾十個人一齊都手寫咗唔同嘅字句。」

除咗扭蛋同埋舊物之外，成員都整理咗土家咁多年活動嘅時間線，寫成各種唔同嘅故事。幹事阿彬:「呢邊就係我哋另一個重中之重，就係100+，我地呢度有120個人左右，係一啲描述特徵性格呀參與過嘅嘢呀，可能有啲金句呀，佢成日好鐘意的口頭禪呀嗰啲，scan呢個qr code就會見到呀。」

幹事瑞玲:「一路嘅pattern都係咁樣，我哋其實一路都係搵唔同嘅拍檔或者街坊，或者佢有唔同嘅才能可以幫手，邊個幫手影相，邊個拍嘢就可以一齊出力合作完成唔同嘅project。」

幹事阿彬:「後面啲相呢都係有朋友拎部printer返嚟印，係手機去搵，搵完，喂，呢張就印。不斷印，邊個搵到就印，好似生產線咁印。土炮得黎，有啲原始，又有啲溫暖。同埋真係好多人都唔係土瓜灣住，但係我哋都仿佛擁有呢個社區，都覺得自己係土瓜灣一份子。因為我哋都覺得社區有好多可能性，好多嘢可以試。即係當區議員無啦，之後社區組織都有冇啦，咁樣嘅時候，咁我哋有冇嘢可以繼續喺度做下呢?我哋相信就係咁樣咁多人聚埋一齊，真係可以有一種互相support，大家一齊互常扶持的狀態，呢段時間最重要係陪伴。」

幹事瑞玲:「頭頂有花牌嗰兩塊花牌，其中一塊寫住化整為零，一塊寫住化零為整嘅。咁我哋而家喺度化整為零的階段式，即將化零為整。」

距離8月16號法庭搬遷期限尚餘不足兩個禮拜，過去半年佢哋一直四處奔波另覓新舖，但隨住屯馬線開通，租金直線上升，將來土家好可能要搬往工廈。街坊四散陶，土家搬遷日後要繼續維繫社區變得困難，但瑞玲仍然相信土家的力量。
幹事瑞玲:「人的連結都是一種魔力，呢度喺個咁多元嘅社區，你可以見到好多需要被陪伴嘅人啦，我哋有能力去陪伴佢。呢幾年我哋互相同街坊陪伴，記錄佢哋故事，我哋都喺度創造咗唔少嘅故事出嚟，那怕係啲好小的事。我哋喺度會講下啲環保嘢呀，發覺原來有啲媽媽真係會自己開始習慣自己帶個盒買菜。有啲街坊其實係本身係比較驚青，之後就慢慢嘗試我唔可以逆來順受嘅，我試下要寫信畀政府部門。我哋希望呢一啲嘅改變，經歷過咁樣嘅社區生活同埋參與，令到佢哋之後喺其他嘅地方佢哋都係有種子埋落黎。對我哋嚟講，呢一度係我哋被拆散咗啦，但係我哋相信其實社區的可能性未完，土瓜灣的社區未完，香港的社區都未完。」

<<土瓜灣情歌>> by my little airport
這一個下雨的夜晚
你是否正在空閒？
我此刻仍留在土瓜灣
想著未來怎麼辦