28/7 《星期三港案》兩個王子的童話故事

Dino︰幾時開始鍾意或者真係覺得係佢呀? 我從來都冇諗過呢啲問題喎，我從來冇諗過唔係佢喎。(騰文師被閃到眼睛...) 但係跟住諗下有咩好深刻嘅回憶我覺得，嘩我一定要跟實佢呀，我諗係一次我要做手術，即係呢d(皮膚)瘡𠝹完之後呢，佢漏夜送咗我去醫院。跟住凌晨搞到四五點啦，咁佢第二朝要返工。跟住呢佢就照顧我啦，佢就話「我唔瞓啦我望住你啦」我以為佢講下啫。佢真係望住我，佢真係等到第二朝天光再自己走咗去返工。

Geoffrey︰佢真係驚青得好緊要啦，咁成個人呢，喺急症室嗰陣時呢我哋喺度等緊見醫生嘅時候呢，佢真係震晒啦。喺嗰個moment咁又真係點都一定要Take care嘅，係囉，冇理由掉低佢一個。

佢哋同普通情侶一樣都係咁在乎大家，不過佢開頭一齊生活嘅時候都唔係好慣㗎，因為兩個都係屋企嘅少爺仔。但係慢慢為咗大家，都開始學識洗衫洗碗拖地煮飯。雖然Geoffrey成日笑Dino嘅暗黑料理，咩「桔檸檬醬撈湯圓蒟蒻麵」，咪又係要照食。但係佢地能夠走到今時今日絕對唔只係靠對方。

〈婚禮現場〉
Dino︰好感恩呢主係帶左呢一位咁好嘅老公喺我身邊。我自己呢就信左耶穌十零年架啦，當初呢信耶穌就係為左睇下可唔可以拗返直嘅。咁結果大家都知就failed啦。當初會好掙扎啦但係我直唔到但係都繼續信，就好多嘅高低起伏啦，但係主好好，佢賜左一班好好嘅團友啦。無論係傳統嘅禮儀教會定係新嘅教會呢，都對我非常非常無條件嘅接納。咁我覺得呢個係一個神跡黎嘅，每一日呢我都經歷緊唔同嘅神跡，但係今日嘅神跡就係透過你地去實現左囉。

Geoffrey︰係呢講返起comeout其實我嗰陣時呢一同佢拍咗拖，過左三個月就開始同啲best friend comeout啦，跟住就再下一步其實就都要同屋企comeout㗎啦。咁都掙扎左好多次嘅其實就，有幾次返屋企食飯呀嗰啲都講到嘴唇邊... 嗰d都結果真係吞返落去講唔出口架... 其實真係好驚講完之後佢地會唔會好嬲呢? 會唔會好失望呢? 會唔會跟住即刻踢我出街呢? 咁不過都好好多謝佢哋啦，咁因為佢哋其實之後只係問咗我兩次呢「你係咪真係sure係佢」。我唔會話佢哋開通、我唔會話佢係開明囉，反而我會話佢哋真係好愛我囉。咁所以我會話真係自己係好幸運既一個人。

Dino︰你真係細個好驚啦，大個諗返起原來細嗰個驚係都真係冇乜意義㗎。因為佢哋嘅愛係可以做到一啲我冇諗過佢地會做到嘅野。其實父母係要再出櫃嘅，同其他人講話我個仔係Gay。但係佢哋會因為愛住佢個仔呢，可以周圍同人講「係啊我哋個仔Gay架，我接受佢呀，我好愛佢呀」其實我哋嘅父母唔會比我哋容易架，佢哋去接受我哋，同我哋去接受自己嘅時候一樣咁困難。