奧運會是敬拜萬神之王宙斯祭典!古代奧運會的起源•終結•會期日程•習俗細節

按美國達特茅斯學院古希臘歷史教授Paul Christesen (Professor of Ancient Greek History at Dartmouth College, USA)認為「古代奧運會本質上係喺古希臘宗教聖地舉行嘅宗教慶典」。古代奧運會嘅運動競賽固然係令到全古希臘以至到週邊地區都為之瘋狂著迷，但係事實上呢D運動競技項目只係成個向宙斯祭獻嘅宗教儀式嘅一部分。(片中配圖係Puzzle and Dragon嘅宙斯...)

古代奧運會喺希臘嘅奧林匹亞舉行，位於希臘伯羅奔尼撒半島西北部，係敬拜宙斯以至到其他希臘神明嘅宗教中心。相傳奧林匹亞係希臘諸神居住嘅神聖之地，而奧林匹亞競技大會就係古希臘時代嘅兩大核心祭典儀式之一，亦因為咁最初嘅奧運會只係希臘十幾個城邦之間嘅競技比賽。

有紀錄嘅第一屆奧運會喺公元前776年舉辦，從此之後每四年一次，大約喺7月尾8月頭嘅盛夏時節舉行，由長年控制奧林匹亞嘅伊利斯城邦所主辦。喺最初嘅幾百年會期只有一到兩日，運動比賽嘅項目都會係一日之內完成。但係隨住競賽項目不斷增加，參加嘅城邦越嚟越多，以及成個宗教儀式嘅規模越來越盛大，古代奧運會由公元前5世紀開始就將會期定為五日。

第一日，運動員同埋裁判就會喺宙斯神像面前宣誓，必須要作出公平嘅比賽同埋公平既裁判。第二日，舉行賽馬相關項目同埋五項全能嘅比賽。第三日就係奧運會入面最重要嘅宗教儀式，全體既與會人員、評委、各個城邦嘅使節就會列隊圍繞奧林匹亞各個神殿巡遊，最後去到宙斯神殿向宙斯獻祭一百隻牛，而當日嘅下晝就係長跑比賽。第四日係最後一日嘅運動競技，成日主要係格鬥項目嘅比賽。而壓軸嘅項目係武裝賽跑，呢個喻意提醒運動競技嘅目的係為戰爭作好準備。最後嘅第五日係各項賽事嘅優勝者嘅慶祝活動。