譚仔上市｜超級通脹殺到要維持高毛利神話米線隨時賣＄90 鐵粉：咁我要離棄三哥了 #壹仔專題

壹週刊 NEXT | 財經類 | May 16, 2021

此影片謄本由解悶工廠製作

★非作商業用途，本檔案版權歸版權持有人獨有★

賣「蓄生」（竹笙）同「墨蜆」（墨丸）都可以賣到上市？譚仔開咗業24年，由粉面小店開到而家成行成市。創辦人三哥同五哥分別以11億同10億賣盤，成為傳奇。而新股東丸龜嘅母公司東多利最近就申請譚仔上市，有三哥嘅粉絲明言會投資譚仔股票，由食米線支持到做小股東。呢一位三哥忠粉（鍾西驅）就特登喺Facebook開Page，為求得到三哥嘅注意，仲成功爭取到中西區係上年年尾開咗間三哥。譚仔IPO，佢講到明會訓身抽呀！「我IPO就應該都會抽既，盡量借埋孖展睇下會唔會抽得中啦。」

譚仔嘅上市賣點就係因為毛利率高達73.2%，即係你每食一碗$60嘅米線，譚仔就可以袋緊$44，睇落去相當之好搵。不過自從疫情開始，全球都印錢救市，令到好多商品同食材都越嚟越貴。近日彭博追蹤左唔同農產品嘅現貨價格指數，創下九年來最大嘅漲幅。一場超級通脹已經係蘊釀當中，睇嚟譚仔超高毛利嘅神話已經見頂。想要維持？無得唔加價~

下載檔案

所有資料非作商業用途，若有內容侵權，請即通知我們移除。

【鐵粉：加價就唔食】
譚仔嘅「物演三小辣」一向都深受港人追捧，鍾西驅作為三哥嘅超級fans，18年特登開咗個Facebook Page，除咗整一啲簡單嘅圖文，仲會間唔時「抽下時事水」。鍾西驅：「我應該係Year 2個陣就做咗個marketing嘅project啦，咁個陣呢佢就要幫一間公司設計一個新嘅Product，跟住呢就發現不如做三哥啦！因為其實三哥都係一個幾多人識嘅Brand，咁同埋佢都仲有好多發展空間啦。我哋拍片嗰陣呢，就係喺中西區係冇任何分店既，所以我地就要去到香港仔嘅分店先可以拍到片。所以我就覺得喂點解中西區咁大個區，幾十萬人住架喎，一間三哥既分店都冇呢？」

身為鐵粉，鍾西驅梗係想默默幫襯啦，但係住喺西營盤嘅佢，想食三哥似乎有啲困難...「一個禮拜，我就冇話真係限定自己要食幾多次既，因為好多時候我都好想有啲即興話我想買三哥啦，我就睇番我個陣係咪好忙啦。點解呢？因為我屋企附近係冇三哥，最近要去到上環啦，我都要行20分鐘，另一間就係香港仔，我仲要搭車過去，所以基本上我真係好想食三哥，我想食好多次，但真係太遠啦...點解中西環冇呢？」

三哥之可以喺芸芸米線鋪入邊突圍而出，最吸引佢嘅一定係個湯底。「最特別既係三哥獨有嘅一個三哥酸辣嘅湯底啦，亦都係我基本上每次去三哥，我都會嗌呢個湯底。咁就係呢個湯底譚仔無架啦，另一樣就係呢個煳辣嘅湯底啦，我覺得好特別啊，因為三哥做湯底時就係想真係有一種燶嘅味道係個湯底出現啦。三哥係當年係主打多啲年輕人市場，咁譚仔就係做一個家庭式既市場，咁我作為一個年輕人，都係比較鐘意三哥啦！」

今次IPO雖然未出定價，但鐵粉就話一定會抽。「始終作為一個三哥既fans，見到一個本地品牌，雖然比日本公司收購左，但見到佢地上市，我都覺得係作為香港一份子，我都覺得好榮幸嘅」

【通脹加劇篤破高毛利神話】
依家香港各有72間譚仔同三哥，深圳有一間譚仔，新加坡仲有三間三哥。譚仔嚟緊仲想拓展到日本同澳洲添啊。本地品牌譚仔製造左唔少嘅神話，創辦人三哥同五哥賣米線賣到發咗達，唔少平民員工加入譚仔之後，仲晉身管理層。曾經任職大家樂嘅三哥品牌總經理劉次軍，早年曾經喺JW萬豪酒店任職，而譚仔品牌助理總經理胡家輝，本來一直都任職麥記，之後進修，拎埋工商管理學士學位，再加入譚仔做埋高層。而譚仔最大嘅賣點，當然係高毛利率啦！睇返譚仔招股書，舊年成個年度，譚仔賣出2894萬碗米線，譚仔同譚仔三哥嘅人均消費分別係$58.5同埋$57.6。佢哋嘅總收入係16.9億，毛利有成12.4億，純利就錄得1.9億。毛利率高達73.2%，而純利率就有11.3%。

豬肉同粟米嘅價格係過去一年升咗一倍，大豆同小麥又分別上漲80%同埋30%。唔單止咁呀，連嘢食嘅運輸同包裝成本都上升。譚仔主打平價同埋大眾化去吸客，但係一旦上市，再加上通脹，價格分分鐘會有變動。

以而家人均消費$60計，如果通脹令成個整體成本大升五成，即係食物成本會上升到$24.12，而收益就會跌到$35.88，毛利率亦都會跌到59.8%。如果要維持毛利率去到73.2%，咁譚仔就要大幅加價。

「先生$90呀，唔該~」物價飛升，肺炎衝擊下，打工仔能夠保住飯碗已經算好好彩。鐵粉鍾西驅亦都明言，如果譚仔加價，佢就會唔食。「我諗佢個原意都係希望大家都可以享受到佢既美食，如果佢個定價真係去到好貴，譬如$80、$90先一碗，我諗大家食米線嘅人，自己都會離棄三哥囉...」

根據政府統計署資料顯示，三月嘅基本通脹率係0.2%，主要係因為外出用膳嘅費用，同埋豬肉價格上升所引致。另外食品價格升幅加快，令到三月基本消費物價按年微升0.2%。有專家就覺得，未來半年通脹會有上升嘅趨勢，而譚仔亦都會輕微加價。經濟學家關焯熙：「即使經濟都係差，但係又有啲食物既原材料價格嘅上升壓力。」不過租金下跌緊，希望可以舒緩一下啦。

「飲食個個失業率高既，即係話人工方面無咩壓力。租金方面因為咁多「吉鋪」，鋪租唔會咁貴既，無以前咁癲，所以變左食材原料價格升，係其他部份會紓緩番，所以升幅唔會太勁。太貴既我咪唔食你，加得緊要我咪揀食其他地方。」譚仔如果要維持定價同埋毛利率，仲有一個方法，就係細碗啲啦。

【三哥無悔賣盤：三哥做了大半世已經做夠】
首間譚仔係1996年喺長沙灣開業，原本由三哥、六哥等人一齊創辦，之後五哥亦都加入。佢哋喺零三年成立咗同心飲食有限公司，生意越做越大，仲一齊開分店。直至零八年，幾兄弟因為意見不合而拆夥，就係咁誕生左譚仔同三哥，一齊平分當時12間既分店。雖然譚仔嘅家族分家好多年，各自有各自嘅發展，但係2017年嘅年中，日本丸龜嘅母公司東多利以10億港元收購譚仔，之後再以11億港元收購三哥，從此港資就變成日資。

發達之後，三哥同五哥都冇另起爐灶，仲齊齊買磚頭做包租公啊！三哥同五哥係一八年分別以7000萬同1.7億買咗個複式單位同一間洋房。五哥本身亦有舖位收租，保守估計身家超過6億。至於三哥，計埋個複式單位，手頭上有三個物業，總值差唔多去到1億。賣盤之後舉家移民去台灣，對於譚仔即將上市，三哥個仔就大讚丸龜好嘢！不過三哥就冇乜點樣關心上市嘅進度，但就一啲都冇後悔賣盤啦！